Флешмобда болалар ва ўсмирлар спорт мактаблари тарбияланувчилари, шунингдек турли спорт федерациялари ва ассоциацияларидан 300 нафарга яқин спортчи ва тренерлар иштирок этди.

Бугун мамлакатимиз бўйлаб Ўзбекистон Республикасининг «Давлат байроғи тўғрисида»ги қонун қабул қилинганлигининг 29 йиллиги кенг нишонланаяпти. Шу муносабат билан жойларда турли оммавий тадбирлар ҳам ташкил этилмоқда.

Жумладан, Ўзбекистон Республикаси Жисмоний тарбия ва спорт вазирлигида ҳам #bayroq_29yoshda хештеги остида оммавий флешмоб ўтказилди. Унда вазирликнинг масъул ходимлари, болалар ва ўсмирлар спорт мактаблари тарбияланувчилари ҳамда турли спорт федерациялари ва ассоциацияларидан 300 нафарга яқин инсон иштирок этди.

Тадбирда сўзга чиққанлар давлатимиз байроғи қабул қилинганлигининг 29 йиллиги муносабати билан йиғилганларни муборакбод этиб, Ватанимиз байроғи билан боғлиқ ширин хотираларни, унутилмас воқеаларни сўзлаб беришди. Жаҳон ареналарида курашга чоғланган ҳар бир спортчи аввало ўз шаъни, ғурури учун спорт майдонига тушиши, шу билан бирга у ортида Ватани, халқи, ота-онаси, қолаверса Президенти турганлигиини юракдан ҳис қилиб, улар учун ҳам курашмоғи кераклиги таъкидланди.

Эътиборли жихати шундаки, ушбу тадбирда қилчбозлик бўйича Миллий терма жамоа вакиллари ҳам фаол иштирок этишди. Албатта, спортчилар том маънодаги хақиқий ватанпарварлардир. Жаҳон спорт ареналарида ғолиблик учун кураш олиб борувчи ҳар бир спортчи ўз ғалабаси шарафига кўтарилган Ватан байроғи шубҳасиз унинг қалбини ғурур ва ифтихорга тўлдириши табиий.

Дарҳақиқат, ҳур ва озод Ватан байроғининг қадрини бошқа ҳеч бир соҳа вакиллари спортчилар каби теран ҳис қилмасалар керак. Зеро, спортчи ўғил-қизларимиз спорт майдонида айнан Ватан байроғини юқори кўтариш учун баҳслашади. Уларнинг ғалабаси шарафига дунёнинг олис бурчагида ҳур ЎЗБEКИСТОН байроғининг мағрур ҳилпираши эса ҳар бир юртдошимиз қалбида фахр ва ифтихор туйғуларини жўш уришига сабаб бўлади. Шундай экан, ушбу сана спортчилар ва спорт жамоатчилиги учун қадрли байрамлардан, десак муболаға бўлмайди.