ОСИЁ ЧЕМПИОНАТИДАН ХАБАРЛАР (ЯПОНИЯ)
ОСИЁ ЧЕМПИОНАТИДАН ХАБАРЛАР (ЯПОНИЯ)
Аввал хабар қилинганидек, Япониянинг Тиба шаҳрида жорий йил 13 июнда қиличбозлик бўйича Осиё чемпионати доирасидаги мусобақаларга старт берилди. Мазкур турнирда 2020 йили Токио шаҳрида бўлиб ўтадиган ёзги Олимпия ўйинларига йирик лицензион очколар ўйналади.
Регламентга кўра, 13 июнь дастурида эркаклар ўртасида рапира ва аёллар ўртасида сабля йўналиши бўйича ғолиб ва совриндорлар аниқлаб олинди. Осиё чемпионатида жами 11 нафар спортчи юртимиз шарафини ҳимоя қилмоқда.
Қиличбозликнинг сабля йўналишида бўлиб ўткан яккалик бахсларида, турли мамлакатлардан ташриф буюрган жами 68 нафар спортчи-қизлар иштирок этди. Мазкур турнирнинг илк куни дастури бўйича ўзбек қиличбоз-қизларидан — 3 нафар саблячимиз Севинч Исмоилова, Зайнаб Дайибекова ҳамда Яна Обинцева ғолиблик учун жанг қилишди.
Ушбу мусобақа натижаларига кўра Миллий терма жамоамиз вакиласи Зайнаб Дайбекова етакчи спортчилар гуруҳида 19- ўринни эгаллаб, кучли 32таликка кирди. Севинч Исмаилова ҳам 29-ўринда 32талик гуруҳдан жой олди. Афсуски, спортчимиз Яна Обвинцева ўз жамоадошларидан бироз ортда колди.
Шундай қилиб, сабля бўйича миллий терма жамоа мураббийи Александр Житецкий тафсилотларига кўра —“саблячи-қизларимиз Севинч Исмоилова мусобақа давомида 5та жангдан 2тасида ғалаба қозонган бўлса-да, яхши коэффициентга эга бўлди.
Зайнаб Дайибекова эса 6та жангдан 5тасини ғалаба билан якунлаб, афсуски кучли 16талик гуруҳига кириш учун ўтказилган беллашувда бироз сусткашликка йўл қўйди. Обвинцева Яна эса 5та жангдан 2тасида ўз рақибларини енгишга муваффақ бўлди.
Ушбу Осиё чемпионатидаги саблячи эркаклар ўртасида бўлиб ўтган мусоқабада ҳамюртимиз Шерзод Мамутов 5 та беллашувнинг 3 тасида ғалаба қозониб, кучли спортчиларинг 32талик гуруҳи руйхатига кирди. Пазил Генжабаев эса 64талик гуруҳ руйхатидан ўрин эгаллади”.
Албатта, бу каби нуфузли халқаро Турнирда иштирок этаётган бизнинг спортчиларимиз бошқа мамлакатдан қатнашаётган атлетларга нисбатан хали жуда ҳам ёш. Улар энди, энди ўз тажрибаларини оширмоқдалар. Шу боис ҳам, спортчиларимиз олдинда ўз устида янада кўпрок ишлаши, меҳнат қилиши, етакчи моҳир қиличбозларнинг энг сара техникаларини ўзлаштириши борасида жуда кўп ишлашларни амалга оширишлари талаб этилади.
Шундай қилиб, мазкур Турнинг шпага йўналишидаги қизлар ўртасида ўтказилган яккалик бахсларида миллий терма жамоа вакиласи Малика Хакимова ўзининг бор маҳоратини намоён этиб, мусобақада иштирок этаётган энг кучли спортчиларнинг 16талик гуруҳ таркибига кирди.
Спортчиларга ҳамроҳлик қилаётган миллий терма жамоа мураббийларининг таъкидлашича “ўзбек қиличбозларининг мазкур турнир беллашувларидаги рақиблари ҳам ёши, ҳам тажрибаси нуқтаи-назаридан анчагина кескин фарқ қилса-да, спортчиларимиз қиличбозлик йўлакчасида бор куч ва маҳоратларини, ўз билими ва имкониятларини тўла ишга солиб ҳаракат қилишмоқда.
Албатта, ҳар қандай мусобақада тажриба устунлик қилади ва энг кучлиларгина ғолиб бўлади.
Тиба шаҳрида ўтказилаётган қиличбозлик бўйича Осиё Чемпионати мусобақалари давом этмоқда. Кейинги бахсларда иштирок этувчи барча ҳамюртларимизга омад тилаймиз!
ЎҚФ матбуот хизмати
