Марказий Осиё қиличбозлик конфедерацияси аъзолари – миллий қиличбозлик федерациялари раҳбарларининг матбуот анжумани

 

15 февралда Республика гимнастика бўйича болалар-ўсмирлар спорт мактаби мажмуасида Марказий Осиё қиличбозлик конфедерацияси аъзолари – миллий қиличбозлик федерациялари раҳбарларининг оммавий ахборот воситалари журналистлари учун матбуот анжумани ўтказилди.

Матбуот анжуманини Марказий Осиё қиличбозлик конфедерациясининг раиси, Ўзбекистон  қиличбозлик федерациясининг раиси Р.М.Шоабдураҳмонов очди. У Конфедерация фаолиятининг дастлабки натижалари, Марказий Осиё қиличбозлик конфедерациясининг кадетлар ва ўсмирлар ўртасида Биринчи очиқ чемпионати ўтказилишининг ташкил этилиши ҳақида гапириб берди.

Журналистларга Марказий Осиё қиличбозлик конфедерацияси давлат рўйхатидан ўтказилганлиги тўғрисидаги гувоҳнома ва ташкилот Устави тақдим этилди.

Матбуот анжуманида сўзга чиққан Қозоғистон қиличбозлик федерациясининг президенти М.Абиев Марказий Осиё қиличбозлик конфедерацияси фаолиятининг жўшқин бошланганлигига эътиборни қаратди. Ташкилот фаолиятини бошлаган уч ойдан сал кўпроқ вақт ичида у давлат рўйхатидан ўтказилди,  режалари ишлаб чиқилди, биринчи расмий чемпионат ташкил этилди.

Тожикистон қиличбозлик федерациясининг президенти Т.Абдураҳмон Халқаро қиличбозлик федерацияси, шахсан унинг Президенти А.Усмоновга Марказий Осиё қиличбозлик конфедерациясини ташкил этиш ташаббуси, минтақанинг миллий федерацияларига қиличбозлик спортини ривожлантириш бўйича  кўрсатаётган катта ёрдами учун самимий миннатдорчилигини билдирди. Жумладан, Тожикистонда кейинги пайтларнинг ўзида 7 та янги қиличбозлик матабини ташкил этишга муваффақ бўлинди.

Марказий Осиё қиличбозлик конфедерациясининг Бош котиби, Афғонистон  қиличбозлик федерациясининг президенти А.Тариқ Конфедерациянинг режаларига тўхталди. Жумладан, яқин орада Марказий Осиё қиличбозлик конфедерациясининг чемпионатини ташкил этиш кўзда тутилмоқда. Миллий терма жамоалари қиличбозларининг биргаликдаги машқлари ўтказилади. Шу йилнинг июнь ойида  Токиода бўлиб ўтадиган Осиё чемпионатига тайёргарлик кўриш бошланган. Тренерлар ва судьялар тайёрлашга ҳам катта эътибор берилади.

Туркманистон  қиличбозлик федерациясининг вице-президенти В.Воронин Ўзбекистон  раҳбариятига Марказий Осиё қиличбозлик конфедерациясининг кадетлар ва ўсмирлар ўртасида Биринчи очиқ чемпионатини ташкил этганлиги учун чуқур миннатдорчилигини изҳор қилди. 

Миллий қиличбозлик федерацияларининг раҳбарлари оммавий ахборот воситалари журналистларининг саволларига жавоб бердилар.