Олимпия ўйинлари ўз тарихида кўплаб ғалабаларга шоҳид бўлган. Бироқ Атланта-1996 Олимпия ўйинларида спорт гимнастикасининг жамоавий кўпкураш йўналишида тарихий воқелик содир бўлган. Аёллар ўртасидаги баҳсда барча жамоадан сўнг мезбонларга навбат етиб келди. Якуний чиқишни таяниб сакраш машқида Керри Страгга амалга ошириши лозим эди. Спортчи биринчи уринишдан сўнг тўпиғини икки четидан синдириб олади. Ҳамма мусобақа шу ўринда якунланди, деган бир пайтда Страг иккинчи уриниш учун югуриш йўлкасига чиқишга жазм қилди. Бу ҳаракат билан ўз саломатлигини хавфга қўйган бўлса ҳам якунда америкалик гимнастикачи муваффақиятли уриниш билан жамоаси ва ўзи учун тарихий ғалабани келтирди.
Аслида бундай тарихий ғалабаларга спорт оламидан қатор намуналарни келтириб ўтиш мумкин. Мисол учун, ўзимизнинг афсонавий боксчи Руфат Рисқиевнинг жаҳон чемпионатида синган бармоқлари билан жанг қилиб, якунда ғалаба қозонганини яхши эслаймиз. Уларнинг оғриқни вақтинча унутиб, юрт шаъни учун бундай иродали чиқишларини тарих асло унутмайди.