ЖИЗЗАХДА ҚИЛИЧБОЗЛИК БЎЙИЧА ВИЛОЯТ ОЧИҚ ЧЕМПИОНАТИ

ЖИЗЗАХДА ҚИЛИЧБОЗЛИК БЎЙИЧА

ВИЛОЯТ ОЧИҚ ЧЕМПИОНАТИ

 

Куни кеча Жиззах шаҳрида 2004 йил ва ундан кичик ёшлар ўртасида қиличбозлик бўйича вилоят очиқ чемпионати бўлиб ўтди. Мазкур мусобақада Қорақалпоғистон ва Хоразм вилояти спортчилар қатнашди

Ўзаро кескин ва қизиқарли кечган яккалик баҳсларда ўғил болалар ўртасида Қорақалпоғистонлик спортчи  Эшонов Алланиёз 1-ўринга сазовор бўлди, у барча рақиблари устидан ғолиб бўлиб, турнинг энг кучли спортчисига айланди.

Шундай қилиб, 2-ўрин Ганиев Сардорга (Жиззах),  иккита 3- ўрин эса Ахрорқулов Амирхон (Жиззах) ҳамда Қорақалпоғистонлик Муратбоев Улуғбекларга насиб этди.

Ўғил болалар ўртасида бўлиб ўтган жамоавий  баҳсларда 1-ўринни Қорақалпоғистон жамоаси қўлга киритган бўлса-да, ғалаба шоҳсупасининг 2- ва 3-ўринларини Жиззах шаҳри жамоалари эгалладилар.

Қиз болалар ўртасида бўлиб ўтган яккалик баҳсларда ғалаба шоҳсупасининг барча поғоналари Жиззахлик қиличбоз қизларга насиб этди.

Турнинг ғолибига айланган Ганиева Шахнозага 1-ўрин, 2-ўрин Шокирова Самира ҳамда иккита 3-ўрин Абдуллаева Жасмина ва Қорақалпоғистонлик спортчи Жумамуродова Айкозга тақдим этилди.

Шунингдек мазкур турнир доирасида қизлар ўртасида бўлиб ўтган жамовий беллашувларда 1-ўринни Жиззах жамоаси, 2-ўрин Қорақалпоғистон қиличбоз қизлари ва 3-ўринни Хоразм жамоалари қўлга киритишди.

  • Вилоятимизда ташкил этилган қиличбозлик бўйича вилоят очиқ чемпионати жуда қизғин ва муросаз кечди — дейди вилоят Қиличбозлик федерацияси ижрочи директори Холмуродов Хамроз. — Албатта, сўнги йилларда вилоятимиз ёш қиличбозлари кўрсатаётган натижалар қувонарли.

Бу борада Ўзбекистон қиличбозлик Федерациясининг жойлардаги минтақавий бўлинмаларни қўллаб-қувватлашга қаратилган ва аниқ мақсадларга йуналтирилган самарали ишларини алоҳида таъкидлаш ўринли. Яқиндагина Жиззах шаҳрида фаолият олиб бораётган қиличбозлик залига иккита янги қиличбозлик махсус йўлакчалари ва электрон фиксатор табло тақдим этилди. Бу эса биз-мураббийларнинг ўқув-машғулотларини сифатли ўтказиш даражасига ижобий таъсир кўрсатади. Вилоятимизга ушбу турнирда қатнашиш учун Қорақалпоғистон республикаси ҳамда Хоразм вилоятидан келган спортчилар ва мураббийларга ҳам бу каби очиқ мусобақалар албатта, катта тажриба алмашиш майдони бўлиб хизмат қилади.

 

ЎҚФ матбуот хизмати