Olmaliq kon-metallurgiya kombinati «Olmaliq KMK» AJ

O’zbekiston Respublikasi Markaziy Osiyo davlatlari orasida juda qulay tabiiy-geografik sharoitga ega davlatdir. Mamlakatimiz katta zahirali yer osti boyliklariga ega. Zaminimiz tabiiy gaz, qo’ng’ir va tosh  ko’mir, oltin, mis, volfram, vismut hamda ochiq neft konlari zahirasiga ega.

Xususan, Olmaliq hududi qadimdan konchilikka ixtisoslashgan zamin hisoblanadi. Eramizning IX-XII asrlariga taaluqli bo’lgan ko’plab qadimgi topilmalar va ruda qazuvchilar faoliyatining izlari hamma joyda qayd etilgan. Bu esa Olmaliqda qadimda mis, qo’roshin, rux, oltin, kumush, temir, ametist, feruza va boshqa qazilmalar jadal ravishda qazib olinganligidan darak beradi. Kombinat tomonidan ishlov beriladigan deyarli barcha ruda konlari o’z vaqtida o’sha qadimgi konlar izlari bo’yicha ochilgan.

Respublikamizda konchilik va metallurgiya sanoati yildan yilga rivojlanib bormoqda. Xususan,  36 ming nafardan ortiq konchi-metallurgni birlashtirgan, O’zbekiston rangli metallurgiyasining bayroqdori Olmaliq kon-metallurgiya  kombinatida 40 dan oshiq millat va elat vakillari bo’lgan konchi-metallurglar mehnat qilishadi.  O’zining 70 yillik tarixi davomida mamlakatimiz iqtisodiy salohiyati rivojiga munosib hissa qo’shib kelayotgan «Olmaliq KMK» AJ O’zbekistondagi eng yirik sanoat korxonalaridan biri bo’lib, uning ishlab chiqarish quvvati Toshkent, Jizzax, Namangan, Surxondaryo viloyatlarida joylashgan mis-molibden, qo’rg’oshin-rux, oltin va kumush konlariga asoslanadi.

Ona-zaminimiz bag’ridagi nodir, rangli  va qimmatbaho metallarni qazib olishga hamda ularni qayta ishlashga ixtisoslashgan ushbu kombinat konlaridan qazib olinayotgan ma’danlar tarkibida Mendeleev davriy jadvalidagi elementlarning deyarli barchasi mavjud.

Oltita kon, beshta boyitish majmualari, uchta metallurgiya zavodi, quvur mahsulotlari asosan eksportga yo’naltirilgan mis quvurlari hamda sement ishlab chiqaruvchi Jizzax va Sherobod sement zavodlariga ega bo’lgan Olmaliq kon-metallurgiya kombinati tarkibida eng zamonaviy avtomobil transporti bilan jihozlangan, 7ta avtobazaga ega bo’lgan Avtomobil transporti boshqarmasi, 3ta temiryo’l sexini o’zida birlashtirgan Temiryo’l transporti boshqarmasi, shuningdek 40ga yaqin yordamchi zavodlar, sexlar va bo’limlar bor. Ular – kombinatdagi mahalliylashtirish dasturi ijrochisi Markazyi ta’mirlash mexanika zavodi, korxonalarimizni ohak xom-ashyosi bilan ta’minlab kelayotgan Ohak zavodi, konchilar ishini yengillashtirayotgan Portlatish materiallari zavodi, shuningdek, Issiqlik energiya markazi, Sanoat suv ta’minoti sexi, Elektr tarmoqlari boshqarmasi, kapital qurilish boshqurmasi, kombinat va shaharda olib borilayotgan bunyodkorlik ishlarining boshida turgan “Olmaliq metallurgqurilish” tresti, Ixtisoslashgan ta’mir ishlari boshqarmasi va boshqalardir.

Bundan tashqari “Olmaliq KMK” AJ “KNOW-HOW IN PRODUCTION PROCESS”, OOO “AWP”, OOO“HPC SYSTEMS” kabi qo’shma korxonalar bilan hamkorlikda, jahon standarti talablarida eksportbop mis kuparosi, san-texnika vositalari, armatura va kabel mahsulotlarini ishlab chiqarmoqda.

Kombinatda ishlab chiqarilayotgan oltin va kumush London qimmatbaho metallar birjasining sifat belgisiga, ya’ni “Yaxshi yetkazib beruvchi” maqomiga ega. Mis ishlab chiqarish jarayonida sifat tizimi menejmenti joriy etilib, unga Xalqaro muvofiqlik sertifikati olingan. Ushbu muvofiqlik sertifikati kombinatning Jizzaxdagi  sement ishlab chiqarish jarayoniga ham berilgan.

2018 yilning iyul oyida “Olmaliq KMK” AJ davlat tasarrufida qoldirilgan holda, “SFI Management Group”ning ishonchli boshqaruviga topshirildi.

Rossiyalik ishbilarmon hamyurtimiz Alisher Usmonov rahbarligida metallurglar, konchilar va qimmatbaho metall qazib olish sohasining yetuk olimlari ishtirokida ekspertlar guruhi tashkil etilgan bo’lib, ular tomonidan Olmaliq kon-metallurgiya kombinatini uzoq muddatda modernizatsiya qilish bo’yicha dastur ishlab chiqildi. Dasturda qimmatbaho metallarni ishlab chiqarish va qayta ishlashga ilg’or xorijiy tajribani joriy qilish ko’zda tutilgan.

Dastlabki hisob-kitoblarga ko’ra, ushbu dasturni tatbiq etish uchun taxminan 300 million dollardan ortiq mablag’ yo’naltiriladi. Bu esa yiliga mis ishlab chiqarish hajmini 109 ming tonnadan 140 ming tonnagacha, rux metallini ishlab chiqarishni 78 ming tonnadan 120 ming tonnagacha, oltingugurt kislotasi ishlab chiqarishni qariyb ikki barobar - 845 ming tonnadan 1,6 million tonnagacha oshirish imkonini beradi.

Qimmatbaho va nodir metallarni qazib olish hamda qayta ishlash avvalgi yillarga nisbatan 1,3 martaga ortadi.

Mahsulotlarni sotishdan olinadigan daromad 1,5 barobarga ortib, 12 trillion so’mga yetadi. Davlat byudjetiga tushumlar hajmi ham 1,4 barobarga ortib, 5 trillion so’mdan ortadi. Kombinatning sof foydasi ham 1,4 barobarga ortib, 1,6 trillion so’mni tashkil qiladi.

Yangi konlarni, jumladan, «Yoshlik 1» (23 million tonna mis-molibden) va «Yoshlik 2» (2 million tonna mis-molibden) konlarini o’zlashtirish va rivojlantirish yo’lida ayni paytda yettita istiqbolli investitsion loyihalar amalga oshirilmoqda.

Endilikda “Olmaliq KMK” AJ rahbariyati istiqbolda ijtimoiy sohadagi chora-tadbirlarni amalga oshirilishini ta’minlash, oddiy ishchidan tortib to markaziy apparat xodimlarigacha bo’lgan mehnat jamoasi bilan uzviy tarzda ishlash, ishlab chiqarishni modernizatsiyalash, ishlab chiqarish salohiyatini va eksportni yanada oshirish, mehnatkashlarni har tomonlama ijtimoiy qo’llab-quvvatlashdek vazifalarni o’z oldiga qo’ygan.

Ta`kidlash joizki, mazkur Kombinatda ishchi va xodimlarining salomatligiga hamda ularni jismoniy tarbiya va sport bilan muntazam shug'ullanishga jalb etish masalalariga alohida e`tibor qaratilgan.

OKMK SPORT KOMPLEKSI

OKMK sport kompleksi zamonaviy standartlar asosida barpo etilgan.

Stadionda jami 8ta sektor mavjud. Shuningdek, SIP va VIP sektorlar eng martabali mehmonlarni qabul qilishga shay holatda. OKMK sport majmuasida nogironlarning stadionga kirib-chiqishi ham inobatga olinib, ular uchun eng qulay nuqtadan 40 ta maxsus joy ajratilgan.

Majmua o’rtasida joylashgan stadion o’z bag’riga 12 mingga yaqin muxlisni sig’dira oladi. Maydon o’lchami 105x68 metr. Maydon respublikamizda yagona bo’lib, uning 35 % sun'iy qoplamadan va qolgan qismi tabiiy maysadan iboratdir.

Har biri 30 nafardan futbolchi va murabbiylarga mo’ljallangan jami to’rtta kiyim almashtirish xonasi sportchilar xizmatida. U yerda yumshoq o’rindiqlar, kiyim-kechaklar uchun maxsus shkaf, yuvinish xonasi, massaj xonasi va boshqa qulayliklarga ega zarur sharoitlar yaratilgan.

Stadionda 11,5x6,70 metr hajmdagi monitor o’rnatilgan. Shuningdek, maydon atrofida balandligi 1,2 metr va uzunligi 128 metrlik reklama monitori joylashtirilgan.

Hakamlar, nazoratchilar, ekspertlar, komissarlar va uchrashuvning boshqa rasmiylari uchun alohida-alohida xonalar eng zamonaviy va barcha zarur jihozlar bilan ta'minlangan. Shu bilan birga tibbiyot va doping nazorati xonalari ham mavjud.

Majmua hududida stadion bilan birga ikkita yopiq sport maydoni (70x38 metr) barpo etilgan. Har birida 500 o’rinli muxlislarga mo’ljallangan tribuna mavjud. Shuningdek, kiyim almashtirish, yuvinish, massaj xonalari sportchilar uchun hozirlangan. Bu maydonning birinchisida futzal, gandbol, voleybol va basketbol jamoalari, ikkinchisida esa kurash, boks, gimnastika va yengil atletika bilan shug’ullanuvchi sportchilar foydalanishadi.

Majmuada tennis maydoni ham barcha talablar asosida barpo etilgan. Ikki taraflama tribunada 1000ga yaqin muxlis sportchilar mahoratidan zavq olishi mumkin. Bundan tashqari ikkita basketbol va tennis mashg’ulot maydoni hamda standart o’lchamdagi (105x68) sun'iy qoplamali maydon yosh sportchilarni yetishtirishda qo’l kelmoqda.

Uchrashuvlarni ommaviy axborot vositalarida yoritish uchun tashrif buyurgan jurnalistlar uchun ham sharoitlar yaratilgan. 50 nafar jurnalist, 10 nafar videooperator, 20 nafar fotomuxbirga mo’ljallangan matbuot anjumanlari zali, 30ga yaqin OAVning turli bo’g’inlaridagi vakillari o’yinoldi va uchrashuvlardan keyin ishlashlari uchun media markaz tashkil etilgan. OAV vakillari uchun stadionning qoq markazidan maxsus "Media tribuna" yaratilgan va ushbu sektor 30 nafar jurnalistga mo’ljallangan. Televideniya va radio sharxlovchilari uchun 2ta maxsus xona bor. Jurnalistlarning ish sifatini yanada tez sur'atda bo’lishini ta'minlash maqsadida yuqori tezlikdagi internet xizmati yo’lga qo’yilgan.

Muxlislarning stadionga kirib chiqishi alohida inobatga olingan bo’lib, bu borada hech qanday muammo bo’lishi mumkin emas. Stadion xududi atrofidagi avtomobillar turar joyi ham har qanday sharoitda ham muxlislarga xizmat ko’rsata oladi.

OKMK sport majmuasi jami 13 gektardan iborat. Yuqorida sanab o’tganmizdek kompleksda asosiy stadiondan tashqari, yana 2ta yopiq maydon, tennis maydoni, basketbol maydonchasi va sun'iy qoplamali futbol maydoni joylashgan. 

O'zQF matbuot xizmati